فرانس کے حکام ایک ممکنہ آتش زنی کے واقعے کی تحقیقات کر رہے ہیں، جس میں ٹولوز کے علاقے پلیزانس میں ایک ڈیلرشپ پر کھڑی 12 ٹیسلا گاڑیاں جل کر تباہ ہو گئیں۔ مقامی خبر رساں ویب سائٹ "لا ڈپیش” کے مطابق اس آگ سے تقریباً سات لاکھ یورو (تقریباً 21 کروڑ 15 لاکھ روپے ) کا نقصان ہوا۔
یہ واقعہ ایسے وقت میں پیش آیا ہے جب یورپ میں ٹیسلا کے خلاف جذبات بڑھ رہے ہیں، خاص طور پر اس کے سی ای او ایلون مسک کے امریکی حکومت کے ساتھ تعلقات کی وجہ سے لوگوں میں غصہ پایا جا رہا ہے۔ اس آگ کے بعد مختلف قیاس آرائیاں کی جا رہی ہیں کہ یہ واقعہ سیاسی ردعمل تھا یا پھر کسی قسم کی تخریبی کارروائی تھا۔
اس حادثے میں آٹھ گاڑیاں مکمل طور پر تباہ ہو گئیں جبکہ چار کو شدید نقصان پہنچا۔ ٹیسلا ڈیلرشپ کی عمارت متاثر نہیں ہوئی، لیکن واقعے کی تحقیقات کے باعث عمارت ایک دن کے لیے بند رہی۔ مقامی حکام نے ایک باڑ میں موجود سوراخ کا حوالہ دیتے ہوئے کہا کہ ابتدائی شواہد آتش زنی کی طرف اشارہ کر رہے ہیں۔
