وزیر اعلیٰ پنجاب مریم نواز نے چین کے دورے کے پانچویں روز بھی بھرپور مصروفیات جاری رکھیں۔ انہوں نے شنگھائی کے لونگ گانگ ڈسٹرکٹ میں ہواوے ٹیکنالوجیز کا دورہ کیا اور مختلف شعبوں کا جائزہ لیا۔ اس موقع پر ہواوے ٹیکنالوجیز کی جانب سے وزیر اعلیٰ کا پرتپاک استقبال کیا گیا۔
وزیر اعلیٰ نے ہواوے گورنمنٹ افیئرز کے صدر، وانگ چینگ ڈونگ سے ملاقات کی، جس میں لاہور کو ایک جدید ڈیجیٹل سمارٹ سٹی میں تبدیل کرنے کے حوالے سے مختلف تجاویز پر تبادلہ خیال ہوا۔ وزیر اعلیٰ نے ہواوے کو لاہور آنے اور پاکستان، خاص طور پر پنجاب میں سرمایہ کاری کرنے کی دعوت دی۔ اس ملاقات کے دوران یہ طے پایا کہ ہواوے کے تعاون سے لاہور کو پاکستان کا پہلا جدید سمارٹ سٹی بنایا جائے گا۔
مریم نواز نے نواز شریف آئی ٹی سٹی میں ہواوے کو دفتر قائم کرنے کی پیشکش کی اور پنجاب میں اسمارٹ فونز کی اسمبلی اور مینوفیکچرنگ کے پلانٹس کے قیام پر مکمل تعاون کا یقین دلایا۔ انہوں نے ہواوے کو پنجاب بھر میں ریٹیل آفسز اور آفٹر سیلز سروس سینٹرز کے قیام کی بھی دعوت دی۔
ملاقات میں ای کامرس، ایکو سسٹم پروڈکشن، صحت اور تعلیم کے شعبوں کی ڈیجیٹلائزیشن پر بھی بات چیت کی گئی۔ ہواوے کے صدر نے وزیر اعلیٰ کو پاکستان، خاص طور پر پنجاب میں جاری منصوبوں کی تفصیلات سے آگاہ کیا۔
وزیر اعلیٰ نے ہواوے کے صحت اور تعلیم کے شعبے میں جاری منصوبوں میں دلچسپی ظاہر کی اور پنجاب کے مختلف شہروں میں سیف سٹی پراجیکٹس پر تبادلہ خیال کیا۔ اس دورے کو دونوں فریقوں کے لیے مثبت پیش رفت کے طور پر دیکھا جا رہا ہے۔
