گھوٹکی کے علاقے میرپور ماتھیلو میں ایک افسوسناک واقعہ پیش آیا جہاں شادی سے انکار پر ایک 50 سالہ خاتون ڈاکٹر نے ایک نوجوان کو شدید تشدد کا نشانہ بنایا۔ اطلاعات کے مطابق، نوجوان کی زبان کاٹ دی گئی اور آنکھوں کو بھی نقصان پہنچایا گیا۔ یہ واقعہ سوشل میڈیا پر خاصی توجہ حاصل کر رہا ہے، اور متاثرہ نوجوان کی خون آلود تصاویر اور ویڈیوز وائرل ہوچکی ہیں۔
پولیس کے مطابق، واقعے کے بعد ایس ایس پی گھوٹکی سمیع اللہ سومرو نے فوری نوٹس لیا اور خاتون ڈاکٹر کے خلاف مقدمہ درج کرلیا۔ تاہم، خاتون ڈاکٹر نے خود تھانے پہنچ کر دعویٰ کیا کہ نوجوان انہیں ہراساں اور بلیک میل کر رہا تھا۔ پولیس نے بتایا کہ دونوں کے درمیان پہلے سے دوستی تھی، لیکن شادی سے انکار کے بعد دونوں میں تنازع پیدا ہوا اور نوجوان نے مبینہ طور پر خاتون کو تصاویر اور ویڈیوز کے ذریعے بلیک میل کرنا شروع کیا۔
ایس ایس پی نے کہا کہ معاملے کی مکمل چھان بین کے بعد دونوں فریقین کے بیانات اور شواہد کی بنیاد پر کارروائی کی جائے گی۔ اس دوران خاتون ڈاکٹر کی شکایت پر بھی مقدمہ درج کرنے کا فیصلہ کیا گیا ہے تاکہ انصاف کے تقاضے پورے کیے جا سکیں۔
