بھارتی ریاست راجستھان میں ایک پاکستان سے آنے والے "جہاز” نے حکام کو پریشان کر دیا۔ مقامی افراد نے اس جہاز کو دیکھ کر فوراً پولیس اور بارڈر سکیورٹی فورس کو اطلاع دی، جس کے بعد پولیس نے علاقے کو سیل کر دیا اور جہاز کی تفصیلی تلاشی لی۔ دراصل، یہ ایک جہاز نما غبارہ تھا جس پر سبز اور سفید رنگ تھے اور اس کی شکل پی آئی اے کے طیارے کی مانند تھی۔ جب یہ غبارہ بیکانیر کے علاقے میں اترا، تو پولیس نے فوری طور پر کارروائی کی اور غبارے کو تحویل میں لے لیا۔ بعد ازاں، پولیس نے اسے بے ضرر قرار دیتے ہوئے بتایا کہ اس میں کوئی بارودی مواد یا ڈیوائس نہیں تھی۔
مقامی افراد نے بتایا کہ پاکستان سے غبارے ملنے کا یہ واقعہ 35 دن میں تیسری بار پیش آیا ہے۔ اس سے قبل بھی کئی غبارے بھارتی ریاستوں میں مل چکے ہیں، جس سے حکام کی دوڑیں لگ جاتی ہیں۔ قابل ذکر بات یہ ہے کہ بارڈر کے دونوں اطراف ڈرونز کے ذریعے اسمگلنگ کے معاملات سامنے آ چکے ہیں۔
