اسلام آباد: سپریم کورٹ میں فوجی عدالتوں میں سویلین کے ٹرائل کے حوالے سے کیس کی سماعت 7 جنوری کو ہوگی۔ جسٹس امین الدین خان کی سربراہی میں 7 رکنی آئینی بینچ کیس کی سماعت کرے گا، جس میں جسٹس جمال مندوخیل، جسٹس محمد علی مظہر، جسٹس حسن اظہر رضوی، جسٹس مسرت ہلالی، جسٹس نعیم اختر افغان اور جسٹس شاہد بلال حسن بھی شامل ہیں۔ اس کے علاوہ، لاپتہ افراد کے کیس کی سماعت بھی 8 جنوری کو اسی آئینی بینچ کے ذریعے کی جائے گی۔
سابق ڈپٹی سپیکر پنجاب کی رولنگ پر نظرثانی کیس کی سماعت 9 جنوری کو ہوگی، جس میں حمزہ شہباز کی نظرثانی درخواست پر بھی فیصلہ سنایا جائے گا۔ ہائیکورٹ کے چیف جسٹسز کے صوابدیدی اختیارات کے خلاف درخواست اور طلبا تنظیموں پر پابندی کے خلاف درخواست بھی 10 جنوری کو آئینی بینچ کے سامنے آئیں گی۔ اسی روز عام انتخابات میں مبینہ دھاندلی کے حوالے سے بانی پی ٹی آئی کی آئینی درخواست اور شیر افضل مروت کی انتخابی دھاندلی کے خلاف درخواست کی بھی سماعت ہوگی۔
