پیرس میں مقیم سوئس سوشائٹ جوسلین ولڈن اسٹائن، جنہیں "کیٹ وومن” کے لقب سے جانا جاتا تھا، 79 سال کی عمر میں انتقال کر گئیں۔ ان کے منگیتر اور طویل عرصے کے ساتھی لائیڈ کلین نے اس خبر کی تصدیق کی۔ جوسلین نے 31 دسمبر 2024 کو اپنی رہائش گاہ پر نیند کے دوران آخری سانس لی۔ لائیڈ کلین نے بتایا کہ وہ انہیں نیو ایئرز ایو ڈنر کے لیے جگانے کی کوشش کر رہے تھے، لیکن وہ انتقال کر چکی تھیں۔ ابتدائی رپورٹس کے مطابق، ان کا انتقال ہارٹ فیلئر کی وجہ سے ہوا۔
جوسلین ولڈن اسٹائن 1945 میں سوئٹزرلینڈ میں پیدا ہوئیں اور آرٹ ڈیلر ایلک ولڈن اسٹائن سے شادی کی، جس سے ان کے دو بچے ہوئے۔ طلاق کے بعد، وہ نیویارک کی مشہور سوشائٹ بن گئیں، اور ان کا طلاق معاہدہ، جس میں انہیں 2.5 بلین امریکی ڈالر ملے، تاریخ کے مہنگے ترین طلاق معاہدوں میں شامل ہے۔
جوسلین کو ان کی پلاسٹک سرجری کی وجہ سے "کیٹ وومن” کے نام سے پکارا جاتا تھا اور ان کے انسٹاگرام پر ایک ملین سے زیادہ فالوورز تھے۔ تاہم، انہوں نے ہمیشہ ان الزامات کو مسترد کیا کہ انہوں نے سرجری اپنے شوہر کو خوش کرنے کے لیے کرائی۔
ان کے منگیتر لائیڈ کلین نے جوسلین کو اپنی بہترین دوست، ساتھی، اور منگیتر قرار دیتے ہوئے کہا کہ ان کا زندگی کے لیے جو جذبہ اور شاندار حسِ مزاح تھا، وہ ہمیشہ ان کے ذہن میں رہے گا۔
