ہفتے کے روز امریکی وزیر خارجہ مارک روبیو نے کہا ہے کہ جنوبی سوڈان کی عبوری حکومت نے امریکا سے ملک بدر ہونے والے سوڈانی شہریوں کو بروقت قبول کرنے سے انکار کیا، جس پر ان کے شہریوں کے امریکی ویزے منسوخ کر دیے گئے۔
امریکی وزیر خارجہ مارک روبیو نے کہا ہے کہ جنوبی سوڈان کے شہریوں کو نئے امریکی ویزے جاری نہیں ہوں گے، انھوں نے واضح کیا کہ اگر امریکا کسی غیر ملکی شہری کو بے دخل کرنا چاہتی ہو، تو متعلقہ ملک کو اپنے اُن شہریوں کی بروقت وطن واپسی کو ممکن بنانا ہوگا۔
امریکا کی جانب سے یہ قدم ایک ایسے نازک وقت میں اٹھایا گیا ہے جب افریقہ میں بہت سے لوگوں کو خدشہ ہے کہ جنوبی سوڈان خانہ جنگی کی طرف لوٹ سکتا ہے۔ واضح رہے کہ امریکی صدر ڈونلڈ ٹرمپ کی انتظامیہ نے امیگریشن کی نئی پالیسی کے نفاذ کو تیز تر کرنے کے لیے جارحانہ اقدامات کیے ہیں، جن میں غیر قانونی طور پر امریکا میں مقیم افراد کی وطن واپسی بھی شامل ہے۔
