عیدالاضحیٰ کی آمد میں صرف دو روز باقی رہ گئے ہیں اور لوگ قربانی کے جانوروں کی خریداری کے لیے مویشی منڈیوں کا رخ کر رہے ہیں۔ جانوروں کے مالک خریدار کو اپنی مرضی کی قیمت بتاتے ہیں جب کہ خریدار کو اگر جانور پسند آ جائے تو وہ قیمت کم کرانے کے لیے بھاؤ تاؤ کرتا ہے۔
کئی بار قیمت کم کرانے کے لیے بھاؤ تاؤ کرنے کے دوران بیوپاری اور خریداروں میں بحث اور تکرار بھی ہو جاتی ہے لیکن ہم آپ کو ایک ایسی مویشی منڈی کے بارے میں بتا رہے ہیں جہاں نہ بھاؤ تاؤ کی ضرورت ہے اور نہ ہی بحث وتکرار ہوتی ہے۔
یہ مویشی منڈی چنیوٹ میں لگائی گئی ہے۔ اس منڈی میں بکرے، دنبے، گائے اور بیل سب موجود ہیں اور کمال کی بات ہے کہ جانوروں کو زندگہ تول کر فروخت کیا جا رہا ہے۔
مویشی مالکان نے جانوروں کی قیمت مقرر کر دی ہے۔ اگر کسی کو گائے، بیل یا بچھڑا چاہیے تو اس کے لیے 900 روپے فی کلو قیمت مقرر کی گئی ہے۔
خریدار کو جو بھی جانور پسند آئے وہ اس کا وزن کرائے اور طے شدہ وزن کی قیمت ادا کر کے بغیر کسی حجت اور تکرار کے من پسند قربانی کا جانور گھر لے جائے۔
یہ طریقہ کاروبار مویشی کے بیوپاریوں کے لیے تو ہے فائدہ مند، خریدار بھی اس نظام سے خوش نظر آ رہے ہیں۔
خریداروں کا کہنا ہے کہ ”یہ سسٹم بڑا زبردست ہے۔ نہ جھگڑا، نہ دھوکا بلکہ جتنا وزن، اتنے پیسے۔ ہم اپنی مرضی اور خوشی سے یہ جانور خرید رہے ہیں۔
