پاکستانی اداکارہ حنا رضوی نے نیلم منیر کی شادی پر ایک صارف کے توہین آمیز تبصرے کا جواب دیتے ہوئے اس کی حمایت کی۔ تین جنوری کو نیلم منیر نے اپنی نکاح کی تصاویر اور ویڈیو شیئر کیں، جنہیں بہت جلد سوشل میڈیا پر مقبولیت حاصل ہوئی۔ ان تصاویر میں دلہا کو عربی لباس میں ملبوس دکھایا گیا تھا اور فوٹو شوٹ دبئی کے معروف برج خلیفہ پر کیا گیا تھا۔ اس کے بعد کئی صارفین نے اندازہ لگایا کہ نیلم منیر نے کسی عرب شخص سے شادی کی ہے اور ان کے شوہر ممکنہ طور پر کاروباری شخصیت ہیں۔ ایک صارف نے نیلم کو دولت کی خاطر عربی شخص سے شادی کرنے کا طعنہ دیا اور کہا کہ "ہلکا ہاتھ مارنا تو سیکھا ہی نہیں ان لوگوں نے”۔
اس تبصرے پر حنا رضوی نے نیلم منیر کی حمایت کرتے ہوئے کہا کہ معاشی طور پر مستحکم شخص سے شادی کرنا کوئی گناہ نہیں۔ حنا نے کہا کہ اگر کوئی خاتون کسی مالی طور پر خودمختار شخص سے شادی کرتی ہے تو اس میں کوئی غلط بات نہیں۔ بیوی کا حق ہے کہ وہ اپنے شوہر کی دولت پر آرام دہ زندگی گزارے۔ تاہم، حنا نے یہ بھی کہا کہ کسی کو یہ حق نہیں پہنچتا کہ وہ کسی خاتون کی زندگی کے بارے میں اس طرح کے ناپسندیدہ تبصرے کرے۔
