پاکستان کرکٹ بورڈ (پی سی بی) کے چیئرمین محسن نقوی نے قومی اوپننگ بلے باز صائم ایوب کو فوری علاج کے لیے لندن بھیجنے کا فیصلہ کیا ہے۔ پی سی بی کے مطابق، چیئرمین محسن نقوی نے صائم ایوب سے رابطہ کر کے ان کی صحت کے بارے میں دریافت کیا اور ڈاکٹرز سے مشاورت کے بعد لندن بھیجنے کا فیصلہ کیا۔ لندن میں صائم ایوب کی اسپیشلسٹ ڈاکٹروں کے ساتھ اپوائنٹمنٹ بھی طے کی گئی ہے، اور ان کے علاج کی تمام میڈیکل رپورٹس لندن بھیج دی گئی ہیں۔
محسن نقوی نے کہا کہ صائم ایوب ایک شاندار اور سٹائلش بیٹر ہیں اور پاکستان کرکٹ کا قیمتی اثاثہ ہیں۔ انہوں نے اس بات کا بھی اعلان کیا کہ صائم ایوب کو جلد از جلد کیپ ٹاؤن سے لندن بھیجا جائے گا، اور اسسٹنٹ کوچ اظہر محمود بھی ان کے ساتھ جائیں گے۔ چیئرمین پی سی بی نے مزید کہا کہ صائم ایوب کی انجری پر انہیں گہری تشویش ہے اور وہ دنیا کے بہترین ہسپتال میں ان کا چیک اپ اور علاج کرائیں گے۔ پی سی بی نے صائم ایوب کے علاج کے لیے تمام وسائل فراہم کرنے کی یقین دہانی کرائی ہے اور امید ظاہر کی ہے کہ وہ چیمپئنز ٹرافی سے قبل مکمل طور پر صحتیاب ہو جائیں گے۔
