کینیڈا کے وزیر اعظم جسٹن ٹروڈو کے استعفیٰ کے بعد امریکا کے نومنتخب صدر ڈونلڈ ٹرمپ نے تجویز دی ہے کہ کینیڈا کو امریکا کی 51ویں ریاست کے طور پر شامل ہو جانا چاہیے۔ ایک غیرملکی خبررساں ادارے کے مطابق، جسٹن ٹروڈو نے پارٹی قیادت اور وزارتِ عظمیٰ کے عہدوں سے استعفیٰ دے دیا ہے۔ تاہم، وہ حکمران جماعت کے نئے سربراہ کے انتخاب تک بطور نگراں اپنے فرائض انجام دیتے رہیں گے۔
سماجی رابطے کی ویب سائٹ ایکس پر اپنے بیان میں ڈونلڈ ٹرمپ نے کہا کہ کینیڈا کے عوام امریکا کے ساتھ ضم ہونے پر خوش ہوں گے۔ ان کا کہنا تھا کہ کینیڈا کو بڑے مالی خساروں کا سامنا ہے، اور یہی وجہ ہو سکتی ہے کہ جسٹن ٹروڈو نے استعفیٰ دیا۔
ڈونلڈ ٹرمپ نے مزید کہا کہ اگر کینیڈا امریکا کا حصہ بن جائے تو ان کے مالی مسائل ختم ہو سکتے ہیں اور عوام کو کم ٹیکس ادا کرنا پڑے گا۔ انہوں نے یہ بھی کہا کہ دونوں ممالک کے اتحاد سے روسی اور چینی خطرات سے بہتر تحفظ ممکن ہوگا، اور یہ دونوں مل کر ایک عظیم قوم بن سکتے ہیں۔
