ڈائریکٹوریٹ آف نیشنل سیونگز (سی ڈی این ایس) نے قومی بچت اسکیموں پر منافع کی شرح میں کمی کا اعلان کیا ہے، جو 25 فروری سے نافذ العمل ہے۔
اسپیشل سیونگ سرٹیفکیٹس پر منافع کی شرح 20 بیسز پوائنٹس کم ہو کر 11.20 فیصد سے 11 فیصد کر دی گئی ہے، جبکہ شارٹ ٹرم سیونگ سرٹیفکیٹس پر یہ شرح 33 بیسز پوائنٹس کی کمی کے بعد 11.13 فیصد سے گھٹ کر 10.80 فیصد ہو گئی ہے۔ اسی طرح، ڈیفنس سیونگ سرٹیفکیٹس کی شرح میں معمولی کمی کرتے ہوئے 12.15 فیصد سے 12.14 فیصد کر دیا گیا ہے۔
سیونگ اکاؤنٹس پر بھی 20 بیسز پوائنٹس کی کمی کی گئی ہے، جس کے بعد منافع کی شرح 11.20 فیصد سے گھٹ کر 11 فیصد ہو گئی ہے۔ پنشنرز بینیفٹس اکاؤنٹس اور شہداء فیملی ویلفیئر اکاؤنٹس پر منافع کی شرح 10 بیسز پوائنٹس کم ہو کر 13.68 فیصد سے 13.58 فیصد مقرر کی گئی ہے۔
اسلامی بینکاری کے تحت سروا اسلامی ٹرم اکاؤنٹس اور سروا اسلامی سیونگ اکاؤنٹس پر بھی 16 بیسز پوائنٹس کی کمی کی گئی ہے، جس کے بعد ان کی شرح 9.90 فیصد سے کم ہو کر 9.74 فیصد ہو گئی ہے۔
