آئی سی سی چیمپئنز ٹرافی 2025 کے لیے پاکستان کا 15 رکنی اسکواڈ کا اعلانپاکستان کرکٹ بورڈ (پی سی بی) نے آئی سی سی چیمپئنز ٹرافی 2025 کے لیے 15 رکنی اسکواڈ کا اعلان کر دیا ہے، جس میں چار تبدیلیاں کی گئی ہیں۔ گزشتہ سال جنوبی افریقہ کے خلاف کھیلی گئی ون ڈے سیریز کے مقابلے میں اس بار عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخر زمان، خوشدل شاہ اور سعود شکیل کو ٹیم میں شامل کیا گیا ہے۔
پاکستانی اسکواڈ میں بیٹرز میں بابر اعظم، فخر زمان، کامران غلام، سعود شکیل اور طیب طاہر شامل ہیں، جبکہ آل راؤنڈرز کے طور پر فہیم اشرف، خوشدل شاہ اور سلمان علی آغا (نائب کپتان) ٹیم کا حصہ ہوں گے۔ وکٹ کیپر بیٹرز میں محمد رضوان (کپتان) اور عثمان خان کو منتخب کیا گیا ہے۔بولنگ لائن اپ میں اسپنر ابرار احمد، جبکہ فاسٹ بولرز میں حارث رؤف، محمد حسنین، نسیم شاہ اور شاہین شاہ آفریدی ٹیم میں شامل ہیں۔چیمپئنز ٹرافی 19 فروری سے 9 مارچ تک پاکستان میں منعقد ہوگی۔ اسکواڈ میں تبدیلی کے لیے پی سی بی کے پاس 11 فروری تک کا وقت ہوگا، اس کے بعد کسی بھی تبدیلی کی اجازت صرف طبی بنیادوں پر آئی سی سی ایونٹ کی تکنیکی کمیٹی کی منظوری سے دی جائے گی۔
یہی ٹیم چیمپئنز ٹرافی سے قبل کراچی اور لاہور میں ہونے والی سہ فریقی ون ڈے سیریز میں بھی حصہ لے گی، جس میں نیوزی لینڈ اور جنوبی افریقہ کی ٹیمیں شامل ہیں۔ پاکستان چیمپئنز ٹرافی میں اپنا پہلا میچ 19 فروری کو کراچی میں نیوزی لینڈ کے خلاف کھیلے گا۔
