پنجاب کے شہر گجرات میں افسوسناک واقعہ پیش آیا جہاں دم گھٹنے کے باعث پانچ بچے جاں بحق ہو گئے۔ اطلاعات کے مطابق یہ واقعہ شاہ جہانگیر روڈ پر بکرا منڈی کے قریب ایک گھر میں پیش آیا۔
ریسکیو ذرائع کے مطابق جاں بحق ہونے والے بچوں میں چار بھائی اور ایک بہن شامل ہیں۔ ان کی عمریں 13 سالہ لائبہ، 11 سالہ ہاشم، 10 سالہ ہادی، 6 سالہ خنان، اور 6 سالہ فیاض کے طور پر شناخت کی گئی ہیں۔ لاشوں کو قانونی کارروائی کے لیے ڈی ایچ کیو عزیز بھٹی شہید ہسپتال منتقل کر دیا گیا ہے۔
بچوں کی والدہ کا کہنا ہے کہ وہ ہسپتال گئی ہوئی تھیں، اور واپس آنے پر انہوں نے بچوں کو کمرے میں بے ہوش پایا۔ ابتدائی تحقیقات کے مطابق، بچوں نے سردی سے بچنے کے لیے کمرے میں کوئلے جلا رکھے تھے، جس کے نتیجے میں دم گھٹنے سے ان کی موت واقع ہوئی۔
