پاکستانی اداکارہ ہانیہ عامر اور دلجیت دوسانجھ کو ایک ساتھ دیکھنے کے لیے شائقین کا انتظار ختم ہوگیا، کامیڈی، فینٹسی اور ہارر سے بھرپور بھارتی پنجابی فلم سردار جی 3 پاکستان سمیت دنیا بھر میں آج ریلیز کی جائے گی۔
فلم آج برطانیہ، امریکا، کینیڈا، مڈل ایسٹ اور دیگر ممالک میں سنیما گھروں کی زینت بنے گی تاہم حالیہ پاک بھارت کشیدگی اور پاکستانی فنکاروں کی موجودگی کے باعث بھارت میں فلم کی نمائش پر پابندی ہے۔
کچھ دن قبل فلم کا ٹریلر ریلیز ہوا تو بھارتی میڈیا اور سوشل میڈیا پر بھارتی صارفین نے دلجیت دوسانجھ کو خوب تنقید کا نشانہ بنایا۔
گزشتہ روز سندھ، پنجاب اور وفاق، تینوں پاکستانی سنسر بورڈز نے فلم کو پاکستانی سینماؤں میں نمائش کی اجازت دے دی، فلم کو ملک بھر کے سنیما گھروں میں ریلیز کرنے کا سینسر سرٹیفکیٹ مل گیا۔
اداکارہ ہانیہ عامر نے بھی اپنی انسٹاگرام اسٹوری پر فلم کا ایک پوسٹر شیئر کیا، جس میں بتایا گیا کہ ’سردار جی 3‘، ملک بھر کے سینماؤں میں ریلیز کی جائے گی۔
ہانیہ عامر کی جانب سے شیئر کیے گئے پوسٹر میں پاکستان کے کئی بڑے سینماؤں جن میں سینی پیکس، نیوپلیکس سینماز (کراچی)، کیو سینماز (لاہور)، سینٹورس سینی پلیکس (اسلام آباد) سمیت دیگر شامل ہیں۔
سردار جی 3 ایک کامیڈی، فینٹسی اور ہارر سے بھرپور فلم ہے، اس میں دلجیت دوسانجھ کو ایک ایسے کردار میں دکھایا گیا ہے جو بھوتوں کا پیچھا کرتا ہے۔
فلم کی کہانی برطانیہ میں ایک آسیب زدہ حویلی کے گرد گھومتی ہے، جہاں دلجیت، ہانیہ عامر، نیرو، گلشن گروور، جسمین اور دیگر فنکار ناصر چنیوٹی، سلیم البیلا اور دانیل خاور کے ہمراہ ایک مہم پر نکلتے ہیں۔
