بھارتی کرکٹر یوزویندر چہل اور ان کی اہلیہ اداکارہ و کوریوگرافر دھنا شری ورما حالیہ دنوں طلاق کی افواہوں کے باعث خبروں میں ہیں۔ ان افواہوں کے دوران دونوں نے انسٹاگرام پر ایک دوسرے کو اَن فالو کر دیا ہے، اور چہل نے دھنا شری کے ساتھ اپنی تمام تصاویر بھی ڈیلیٹ کر دی ہیں۔ ایک قریبی ذریعے نے بتایا کہ "طلاق ناگزیر ہے اور یہ صرف وقت کا سوال ہے کہ یہ کب آفیشل ہوگا۔ علیٰحدگی کی وجوہات ابھی تک واضح نہیں ہیں، لیکن یہ بات واضح ہے کہ دونوں نے اپنی زندگیوں میں آگے بڑھنے کا فیصلہ کر لیا ہے۔”
سنہ 2023 میں طلاق کی افواہیں اس وقت زور پکڑیں جب دھنا شری نے اپنے انسٹاگرام پروفائل سے "چہل” ہٹا دیا۔ یہ تبدیلی یوزویندر کے ایک پراسرار انسٹاگرام سٹوری کے ایک دن بعد سامنے آئی، جس میں انہوں نے لکھا تھا "نئی زندگی شروع ہونے والی ہے۔” اس وقت چہل نے ان افواہوں کو مسترد کرتے ہوئے اپنے مداحوں سے درخواست کی تھی کہ وہ ان کے رشتے کے بارے میں پھیلنے والی افواہوں پر یقین نہ کریں اور نہ ہی انہیں بڑھائیں۔
یاد رہے کہ دھنا شری ورما اور یوزویندر چہل نے 11 دسمبر 2020 کو شادی کی تھی۔ اپنی محبت کی کہانی کے بارے میں دھنا شری نے مشہور شو "جھلک دکھلا جا 11” میں بتایا تھا کہ لاک ڈاؤن کے دوران جب کرکٹرز گھروں پر بور ہو رہے تھے، یوزویندر نے ایک دن فیصلہ کیا کہ وہ ڈانس سیکھنا چاہتے ہیں۔ انہوں نے دھنا شری کے ڈانس ویڈیوز سوشل میڈیا پر دیکھے اور ان سے رابطہ کیا کہ وہ انہیں ڈانس سکھائیں، جس کے بعد دونوں میں قربتیں بڑھیں۔
اگرچہ دھنا شری نے انسٹاگرام پر چہل کے ساتھ اپنی تصاویر ڈیلیٹ نہیں کیں، لیکن دونوں کے اَن فالو کرنے اور چہل کی تصاویر حذف کرنے سے مداحوں کے درمیان مزید قیاس آرائیاں شروع ہو گئی ہیں۔
