وزیراعلیٰ پنجاب مریم نواز شریف سے پاکستان ائیر وار کورس کے 79 رکنی وفد کی ملاقات ہوئی، جس کی قیادت ائیر وائس مارشل راشد حبیب نے کی۔ مریم نواز نے پاک فضائیہ کی خدمات کو سراہتے ہوئے کہا کہ یہ قوم کے محافظ ہیں اور ان کی کامیابیاں قابل فخر ہیں۔ انہوں نے زور دیا کہ ٹریننگ اور ڈسپلن سے فورسز مزید مضبوط ہوسکتی ہیں۔
وزیراعلیٰ نے معیشت کی بہتری، مہنگائی میں کمی، زرمبادلہ میں اضافے، اور چینی سرمایہ کاروں کی دلچسپی کا ذکر کرتے ہوئے کہا کہ ملک ترقی کی راہ پر گامزن ہے۔ انہوں نے پنجاب میں نوجوانوں کے لیے بلا سود قرضے، تعلیمی مواقع، خواتین کے لیے روزگار، اور جدید سہولیات فراہم کرنے پر روشنی ڈالی۔ انہوں نے بتایا کہ انفراسٹرکچر، صحت، صفائی، زراعت، اور ٹرانسپورٹ کے منصوبے جاری ہیں، جن میں بلٹ ٹرین، ای ٹیکسی، اور الیکٹرک بسیں شامل ہیں۔
مریم نواز نے کہا کہ حکومت نے شفافیت کے لیے ای ٹینڈرنگ اور فریڈ بیک سسٹم متعارف کروایا ہے، جبکہ کسان کارڈ، گرین ٹریکٹر سکیم، اور زرعی ترقی کے اقدامات سے کاشتکاروں کو سہولت ملی ہے۔ انہوں نے خواتین اور بچوں کے تحفظ کے لیے اقدامات اور عوامی فلاحی منصوبوں پر بات کی۔ ملاقات کے دوران کورس کے شرکا نے حکومت پنجاب کے منصوبوں کو سراہا اور عوامی خدمت کے عزم کی تعریف کی۔
