بھارت کے شہر بنگلور کے ایئرپورٹ پر ایک غیر معمولی واقعہ پیش آیا، جہاں 29 سالہ لڑکی نے اپنے بوائے فرینڈ کو ممبئی جانے سے روکنے کے لیے جھوٹی بم کی اطلاع دی۔
بھارتی میڈیا کے مطابق، یہ واقعہ 26 جون کو پیش آیا جب پونے کی رہائشی اندرا راجور نے اپنے دوست میر رضا مہدی کو ممبئی جانے سے روکنے کے لیے ایک انوکھا قدم اٹھایا۔ اندرا اور میر رضا بنگلور میں ایک ہی دفتر میں کام کرتے تھے۔ اندرا نے ایئرپورٹ پولیس کو ایک نامعلوم نمبر سے کال کر کے یہ اطلاع دی کہ ممبئی جانے والی ایک پرواز میں ایک مسافر کے بیگ میں بم موجود ہے۔ اس نے یہ بھی بتایا کہ وہ مسافر اس کا بوائے فرینڈ ہے۔
پولیس نے فوراً کارروائی کرتے ہوئے طیارے سے میر رضا کو اتار کر اس کی تلاشی لی، تاہم کچھ بھی مشتبہ چیز برآمد نہ ہوئی۔ میر رضا نے پولیس کو بتایا کہ وہ اور اندرا مختلف فلائٹس سے ممبئی جا رہے تھے اور ایئرپورٹ پر پرواز کی روانگی سے پہلے دونوں نے ایک دوسرے سے بات کی تھی۔
اندرا کو حراست میں لے کر پولیس اسٹیشن منتقل کیا گیا، جہاں اس نے اپنا بیان دیا کہ اس کے اور میر رضا کے درمیان کچھ ذاتی اختلافات تھے اور وہ اسے ممبئی جانے سے روکنا چاہتی تھی۔
