وزیر اعلیٰ مریم نواز نے دورہ چین کے پہلے روز بیجنگ میں مصروف ترین دن گزارا۔ انہوں نے ایک ہی دن میں 5 مختلف دورے کیے، 5 اہم ملاقاتیں کیں، اور متعدد مفاہمتی یادداشتوں (ایم او یوز) پر دستخط کیے۔
وزیر اعلیٰ نے سب سے پہلے روبوٹک زرعی آلات تیار کرنے والی معروف کمپنی اے آئی فورس ٹیک کے ہیڈ آفس کا دورہ کیا۔ ان کی کاوشوں کے نتیجے میں چینی کمپنی نے پنجاب میں روبوٹک زرعی آلات کی مینوفیکچرنگ کے لیے پلانٹ لگانے کا اعلان کیا۔ اس موقع پر وزیر اعلیٰ کی موجودگی میں پنجاب حکومت کے محکمہ زراعت اور اے آئی فورس ٹیک کے درمیان ایم او یو پر دستخط کیے گئے۔
وزیر اعلیٰ مریم نواز نے جدید روبوٹک زرعی مشینری کی تیاری کے لیے پنجاب حکومت کی جانب سے مکمل تعاون کی یقین دہانی کرائی۔ دورے کے دوران، اے آئی فورس ٹیک کے بانی ڈاکٹر ہان اور کمپنی کے سی ای او سے ملاقات بھی ہوئی، جس میں وزیر اعلیٰ نے پنجاب میں زرعی اصلاحات کے منصوبوں اور جدید ٹیکنالوجی کے ذریعے زراعت کو فروغ دینے کے عزم سے آگاہ کیا۔
وزیر اعلیٰ مریم نواز نے جدید زرعی ٹیکنالوجی سے مزین روبوٹک آلات کا معائنہ کیا اور ان مشینریوں کی کارکردگی کا مشاہدہ کیا۔ انہوں نے پنجاب کے ایگریکلچر سیکٹر میں روبوٹک مشینری اور جدید ٹولز متعارف کرانے کے عزم کا اعادہ کرتے ہوئے کہا کہ جدید ٹیکنالوجی کے ذریعے کاشتکاروں کی خوشحالی اور زراعت کی ترقی حکومت کا اولین مقصد ہے۔
وزیر اعلیٰ مریم نواز کی دعوت پر اے آئی فورس ٹیک کے ماہرین جلد پنجاب کا دورہ کریں گے، جہاں روبوٹک زرعی آلات کے مینوفیکچرنگ پلانٹ کے قیام کے حوالے سے عملی اقدامات کیے جائیں گے۔
وزیر اعلیٰ نے بلیو ٹیک کلین ایئر الائنس کے دفتر کا بھی دورہ کیا اور تنظیم کے چیئرمین، مسٹر زی ہونگ شنگ، سے ملاقات کی۔ ملاقات کے دوران موسمیاتی تبدیلی کے اثرات اور فضائی آلودگی پر قابو پانے کے لیے جدید ترین طریقہ کار پر تبادلہ خیال کیا گیا۔
وزیر اعلیٰ مریم نواز نے چینی ماہرین کو پنجاب میں موسمیاتی تبدیلیوں سے نمٹنے کے لیے حکومتی اقدامات سے آگاہ کیا۔ چینی ماہرین نے پنجاب حکومت کی فضائی آلودگی کے خاتمے اور ماحولیاتی تحفظ کی کاوشوں کو سراہا۔ اس موقع پر محکمہ ماحولیات پنجاب اور بلیو ٹیک کلین ایئر الائنس کے درمیان مفاہمتی یادداشت (ایم او یو) پر دستخط کیے گئے، جس کے تحت یہ ادارہ پنجاب میں ماحولیاتی بہتری کے لیے تعاون کرے گا۔
بعد ازاں وزیر اعلیٰ نے ہائی جیا میڈیکل ٹیکنالوجی اور شی جی تان ہسپتال کے دورے کیے اور بیجنگ میونسپل کمیشن آف ٹرانسپورٹ کا بھی معائنہ کیا۔ ہائی جیا میڈیکل ٹیکنالوجی کے صدر ڈاکٹر لیو فولیانگ سے ملاقات کے دوران کینسر کے علاج کے لیے جدید مشینری اور چین میں رائج طریقۂ علاج پر تفصیلی گفتگو کی گئی۔ اس موقع پر پنجاب حکومت اور ہائی جیا میڈیکل ٹیکنالوجی کے درمیان ایم او یو پر دستخط بھی ہوئے۔ وزیر اعلیٰ نے پاکستان میں پہلے پبلک سیکٹر نواز شریف کینسر ہسپتال کے منصوبے کے بارے میں آگاہ کیا اور چینی ماہرین کے تعاون سے جدید آلات اور علاج کے طریقوں کو متعارف کرانے کے عزم کا اظہار کیا۔
وزیر اعلیٰ نے پنجاب میں صحت کے شعبے کو ٹیکنالوجی پر مبنی نظام میں تبدیل کرنے کے عزم کا اعادہ کیا اور سرمایہ کاری کے فروغ اور سازگار ماحول کی فراہمی کی مکمل یقین دہانی کرائی۔ ملاقات کے دوران پنجاب اور چینی اداروں کے درمیان تعاون کو مزید مضبوط کرنے پر اتفاق کیا گیا۔ وزیر اعلیٰ نے کہا کہ ہم پنجاب کے ہیلتھ سسٹم کو جدید ٹیکنالوجی کی مدد سے مریض دوست اور مؤثر بنانا چاہتے ہیں۔
شی جی تان ہسپتال کے دورے کے دوران وزیر اعلیٰ کو کیمونسٹ پارٹی آف چائنا کے سیکریٹری مسٹر ژو دیاژن نے جدید طریقۂ علاج، تحقیق، اور پیشنٹ کیئر سسٹم پر بریفنگ دی۔ وزیر اعلیٰ نے ہسپتال کے مختلف شعبوں کا دورہ کرتے ہوئے چین کے جدید ترین صحت کے نظام اور ٹیکنالوجی کے استعمال کا مشاہدہ کیا۔
وزیر اعلیٰ مریم نواز نے چینی ہیلتھ سسٹم میں گہری دلچسپی کا اظہار کیا اور شی جی تان ہسپتال کے ساتھ پنجاب کے ہسپتالوں کے درمیان ٹیلی میڈیسن لنک قائم کرنے کی تجویز پر غور کیا۔ ملاقات کے دوران وزیر اعلیٰ کو بیجنگ کے میڈیکل انشورنس بجٹ مینجمنٹ اور انشورنس سسٹم کے جدید طریقہ کار کے بارے میں بھی آگاہ کیا گیا۔ وزیر اعلیٰ نے ڈاکٹرز اور ہسپتال کے عملے سے بات چیت کرتے ہوئے چین کے ٹیکنالوجی بیسڈ ہیلتھ سسٹم کے تجربے کو سراہا۔
وزیر اعلیٰ مریم نواز نے بیجنگ میں میونسپل کمیشن آف ٹرانسپورٹ کا دورہ کیا، جہاں انہیں بیجنگ کے جدید ٹرانسپورٹ سسٹم کے بارے میں تفصیلی بریفنگ دی گئی۔ بیجنگ ٹرانسپورٹ کمیشن کے ڈپٹی ڈائریکٹر جنرل شانگ وانگ یو نے وزیر اعلیٰ کو سٹیٹ آف دی آرٹ مرکزی کنٹرول روم اور ٹرانسپورٹ کے انتظامی نظام کا معائنہ کرایا۔
ملاقات کے دوران بیجنگ میونسپل ٹرانسپورٹ سسٹم کے ماڈل پر پنجاب میں سمارٹ ٹرانسپورٹیشن پلاننگ کے تحت الیکٹرک وہیکل انفراسٹرکچر کے قیام پر تبادلہ خیال کیا گیا۔ گفتگو میں ماحول دوست اور پائیدار ٹرانسپورٹ نظام کے لیے چین کے تعاون سے موثر اقدامات اٹھانے پر اتفاق کیا گیا۔
وزیر اعلیٰ مریم نواز نے کہا کہ پنجاب کے شہروں میں ماحول دوست اور جدید پبلک ٹرانسپورٹ سسٹم کے قیام کے لیے پرعزم ہیں۔ لاہور اور دیگر شہروں میں میٹرو ٹرین نیٹ ورک کو وسعت دینے کے منصوبے پر بھی کام کیا جائے گا۔ انہوں نے مزید کہا کہ بیجنگ ٹرانسپورٹ سسٹم کا مشاہدہ مستقبل میں پنجاب کی ٹرانسپورٹ پالیسی کے لیے معاون ثابت ہوگا، اور جدید ٹرانسپورٹ کا نظام شہریوں کی سہولت کے لیے انتہائی ضروری ہے۔
وزیر اعلیٰ نے پنجاب میں ٹریفک کی روانی بہتر بنانے کے لیے مربوط ٹرانسپورٹ نظام کی اہمیت پر زور دیا اور کہا کہ لاہور میں اورنج لائن میٹرو ٹرین پاک-چین دوستی کی شاندار مثال ہے۔ لاہور، ملتان، اسلام آباد، اور راولپنڈی میں میٹرو بس منصوبوں کے لیے چین کا تعاون ناقابل فراموش ہے۔
وزیر اعلیٰ نے بیجنگ کے گرین اور سمارٹ ٹرانسپورٹ سسٹم میں ٹیکنالوجی کے اختراعی استعمال کی تعریف کی اور کہا کہ ایسے ماڈلز کو پنجاب کے بڑے شہروں میں نافذ کرنے سے شہریوں کے لیے آسانیاں پیدا ہوں گی اور ماحولیات پر مثبت اثرات مرتب ہوں گے۔
