کیپ ٹاؤن میں دوسرے ٹیسٹ میچ میں پاکستان فالو آن کا شکار ہو گیا اور جنوبی افریقا نے پاکستان کو 194 رنز پر سمیٹ لیا۔ پاکستانی ٹیم نے جنوبی افریقا کے خلاف اپنی پہلی اننگز میں 9 وکٹوں پر 194 رنز بنائے، جس میں صائم ایوب انجری کے باعث بیٹنگ پر نہیں آ سکے۔ اس کے نتیجے میں جنوبی افریقا کو پہلی اننگز میں 421 رنز کی برتری حاصل ہوئی۔
کیپ ٹاؤن ٹیسٹ کے تیسرے دن کے کھیل میں کھانے کے وقفے تک پاکستان نے 6 وکٹوں پر 155 رنز بنائے تھے، جس میں بابر اعظم نے 58، محمد رضوان نے 46 اور سلمان آغا نے 19 رنز بنائے۔ عامر جمال 15 رنز بنا کر آؤٹ ہوئے۔ پاکستان کی 8 ویں وکٹ 194 کے سکور پر گری جب میر حمزہ 13 رنز بنا کر کیچ آؤٹ ہوئے، اس وقت پاکستان کو فالو آن سے بچنے کے لیے 416 رنز کی ضرورت تھی۔
جنوبی افریقا کے کگیسو ربادا نے 3 وکٹیں حاصل کیں، کیشو مہاراج اور کیوانا ماپھاکا نے 2، جبکہ مارکو یانسن اور ویان مولڈر نے ایک ایک وکٹ لی۔ پہلے سیشن کے آغاز کے بعد پاکستان کی چوتھی وکٹ 118 رنز پر گری جب بابر اعظم 58 رنز بنا کر آؤٹ ہوئے۔ پاکستان کی پانچویں وکٹ 144 رنز پر گری جب محمد رضوان 46 رنز بنا کر بولڈ ہوئے اور اس کے کچھ ہی دیر بعد سلمان آغا 19 رنز بنا کر آؤٹ ہو گئے۔
پچھلے دن کے کھیل میں جنوبی افریقا نے 615 رنز پر اپنی اننگز کا اختتام کیا تھا، جس کا جواب دینے میں پاکستان کا آغاز مایوس کن رہا۔ کپتان شان مسعود 2 رنز بنا کر کگیسو ربادا کی گیند پر آؤٹ ہوئے، جبکہ کامران غلام 12 رنز بنا کر مارکو یانسین کی گیند پر بولڈ ہوئے۔ پاکستان کے تیسرے آؤٹ ہونے والے بلے باز سعود شکیل تھے جو بغیر کوئی رن بنائے 20 کے مجموعے پر کگیسو ربادا کا شکار بنے۔ اس سے قبل، کیپ ٹاؤن ٹیسٹ کے دوسرے دن جنوبی افریقا کی ٹیم 615 رنز پر آؤٹ ہوئی تھی۔ جنوبی افریقا کی جانب سے ریان ریکلٹن نے ڈبل سنچری، ٹمبا باووما اور کائل ویریانے نے سنچریاں بنائی تھیں۔ پاکستان کی طرف سے محمد عباس اور سلمان علی آغا نے تین تین وکٹیں حاصل کیں، جبکہ میر حمزہ اور خرم شہزاد نے دو دو وکٹیں لی تھیں۔
