متحدہ عرب امارات نے پاکستانی شہریوں کے لیے 5 سالہ ملٹی پل انٹری (کئی بار آمد و رفت) پر مبنی سیاحتی ویزا دستیاب کر دیا ہے، جو اب آن لائن یا منظور شدہ ویزا سینٹرز کے ذریعے حاصل کیا جا سکتا ہے۔
اس ویزے کی سہولت چند سال قبل متعارف کرائی گئی تھی، جو اب پاکستان سمیت دنیا کے تمام ممالک کے شہریوں کے لیے کھلی ہے۔ اماراتی امیگریشن حکام کا کہنا ہے کہ یہ ویزا ان افراد کے لیے خاص طور پر فائدہ مند ہے جو ماضی میں ویزا کے مسائل کا شکار رہے ہیں یا بار بار یو اے ای کا سفر کرنا چاہتے ہیں۔
یہ ویزا پانچ سال کے لیے مؤثر ہوتا ہے، اور اس کے تحت ویزا رکھنے والا شخص کسی اسپانسر یا میزبان کے بغیر متحدہ عرب امارات میں کئی مرتبہ داخل ہو سکتا ہے۔ ہر ایک داخلے پر 90 دن تک قیام کی اجازت ہوتی ہے، جس میں مزید 90 دن کی توسیع ممکن ہے۔ تاہم، سالانہ مجموعی قیام 180 دن سے تجاوز نہیں کر سکتا۔
امیگریشن حکام کے مطابق، ویزا حاصل کرنے کے لیے درج ذیل دستاویزات درکار ہوں گی:
کم از کم چھ ماہ کے لیے کارآمد پاسپورٹ
حالیہ رنگین پاسپورٹ سائز تصویر
واپسی کا ٹکٹ
متحدہ عرب امارات میں قیام کا ثبوت (مثلاً ہوٹل کی بکنگ یا رہائش کا پتہ)
گزشتہ 6 ماہ کی بینک اسٹیٹمنٹ جس میں کم از کم 4 ہزار امریکی ڈالر یا اس کے مساوی رقم موجود ہو
ایسی ہیلتھ انشورنس جو یو اے ای میں قابل قبول ہو
حکام کے مطابق، درخواست دینے کا عمل انتہائی آسان ہے اور عمومی طور پر درخواست جمع کرانے کے 48 گھنٹوں کے اندر ویزا منظور ہو جاتا ہے۔
یہ پانچ سالہ ویزا ان پاکستانی شہریوں کے لیے نہایت موزوں ہے جو اپنے اہل خانہ سے ملنے، کاروباری امکانات تلاش کرنے یا طویل تعطیلات گزارنے کے لیے یو اے ای کا سفر کرنا چاہتے ہیں۔
