پشاور میں برائلر مرغی کی قیمت میں 25 روپے کا اضافہ ہوا ہے، جس کے بعد فی کلو زندہ مرغی کی قیمت 485 سے بڑھ کر 510 روپے ہوگئی ہے۔ کراچی میں بھی مرغی کی قیمت میں بڑا اضافہ دیکھنے کو ملا ہے، جہاں دکانداروں نے گزشتہ روز کے سرکاری نرخ 635 روپے کو نظرانداز کرتے ہوئے من مانی قیمتیں وصول کرنا شروع کر دیں۔ شہر قائد میں مرغی کا گوشت 700 سے 740 روپے تک فروخت ہو رہا ہے، جس سے ایک ہفتے کے دوران قیمت میں 100 روپے کا اضافہ ہوا ہے۔ انڈوں کی سرکاری قیمت 300 روپے مقرر کی گئی ہے، مگر فی درجن انڈے 380 روپے میں بیچے جا رہے ہیں۔ زندہ مرغی کی سرکاری قیمت 410 روپے مقرر ہے، لیکن ہول سیل میں زندہ مرغی 480 روپے میں فروخت ہو رہی ہے۔
لاہور میں زندہ برائلر مرغی کا تھوک ریٹ 397 روپے ہے، اور پرچون میں اس کا ریٹ 411 روپے فی کلو ہے۔ برائلر گوشت کی قیمت 595 روپے فی کلو پر برقرار ہے، اور انڈوں کی قیمت فی درجن 329 روپے ہے، حالانکہ منافع خور سرکاری نرخوں کو نظرانداز کرتے ہوئے من مانے دام وصول کر رہے ہیں۔ ملتان میں برائلر مرغی کا تھوک ریٹ 398 روپے ہے، زندہ برائلر کا پرچون ریٹ 412 روپے فی کلو ہے، اور برائلر گوشت کی قیمت 595 روپے ہے، جبکہ انڈوں کی قیمت فی درجن 317 روپے ہے۔
اسلام آباد کے نواحی علاقوں میں مرغی کا گوشت 730 روپے فی کلو میں فروخت ہو رہا ہے، جس سے ملک کے مختلف شہروں میں مرغی کی قیمتوں میں واضح فرق نظر آ رہا ہے۔
