بھارتی کرکٹ ٹیم کے کپتان روہت شرما نے سوشل میڈیا پر چلنے والی ریٹائرمنٹ کی خبریں مسترد کرتے ہوئے وضاحت دی کہ وہ ٹیسٹ کرکٹ سے ریٹائر نہیں ہو رہے۔ انہوں نے کہا کہ وہ صرف فارم میں نہ ہونے کی وجہ سے آسٹریلیا کے خلاف سڈنی ٹیسٹ میں نہیں کھیل پائے۔
کھیلوں کی ویب سائٹ "کرک انفو” کے مطابق، روہت شرما نے "اسٹار سپورٹس” سے بات کرتے ہوئے ریٹائرمنٹ سے متعلق افواہوں کا جواب دیا۔ انہوں نے کہا کہ سڈنی ٹیسٹ سے باہر بیٹھنا ریٹائرمنٹ کا فیصلہ نہیں تھا، اور یہ کہ جو لوگ مائیک، قلم یا لیپ ٹاپ رکھتے ہیں، وہ یہ فیصلہ نہیں کر سکتے کہ کسی کھلاڑی کو کب ریٹائر ہونا چاہیے۔
انہوں نے مزید کہا کہ باہر بیٹھے افراد یہ نہیں فیصلہ کرسکتے کہ انہیں کب کھیلنا چاہیے یا کپتانی کرنی چاہیے۔ "میں ایک بالغ انسان ہوں، دو بچوں کا والد ہوں اور مجھے پتا ہے کہ کب کیا فیصلہ کرنا ہے۔”
آسٹریلیا کے خلاف بارڈر گواسکر ٹیسٹ سیریز کے چوتھے میچ میں بھارت کی شکست کے بعد روہت شرما پر شدید تنقید کی جا رہی تھی، کیونکہ اس ہار کے بعد بھارت کے ورلڈ ٹیسٹ چیمپئن شپ کے فائنل میں پہنچنے کے امکانات کم ہوگئے تھے۔
اپنے اوپر ہونے والی تنقید کے جواب میں روہت شرما نے کہا کہ سڈنی ٹیسٹ سے باہر بیٹھنا ریٹائرمنٹ کا اشارہ نہیں تھا اور وہ خود کو کرکٹ سے باہر نہیں کریں گے۔
یاد رہے کہ آسٹریلیا میں جاری "بارڈر گواسکر ٹرافی” کی 5 میچوں کی سیریز میں آسٹریلیا کو 1-2 کی برتری حاصل ہے۔ روہت شرما اپنے دوسرے بچے کی پیدائش کے باعث سیریز کے پہلے ٹیسٹ میچ میں شریک نہیں ہو سکے تھے، اور اس دوران جسپریت بمرا نے ٹیم کی قیادت کی تھی۔ اس میچ میں بھارت نے آسٹریلیا کو 295 رنز سے شکست دی تھی۔
تاہم باقی تین میچوں میں روہت شرما نے قیادت کی، جن میں سے دو میں بھارت کو شکست ہوئی، جبکہ ایک میچ بارش کے باعث بے نتیجہ رہا۔ اس دوران روہت شرما نے آسٹریلیا کے خلاف سیریز کے 3 میچوں کی 6 اننگز میں صرف 31 رنز بنائے، جو کہ بمرا کی جانب سے حاصل کی گئی 30 وکٹوں سے صرف ایک زیادہ تھا۔
"اسٹار سپورٹس” کے ساتھ گفتگو کرتے ہوئے روہت شرما نے کہا کہ رنز نہ بننے کی وجہ سے وہ سڈنی ٹیسٹ سے باہر ہوئے، لیکن کرکٹ میں کبھی کچھ بھی گارنٹی نہیں ہوتی۔ "یہ سلسلہ کبھی 2 رنز سے شروع ہو سکتا ہے اور کبھی 5، لیکن کرکٹ میں سب کچھ پلک جھپکتے میں بدل سکتا ہے۔”
روہت شرما بھارت کی جانب سے 67 ٹیسٹ میچز میں 12 سنچریوں اور 18 نصف سنچریوں کی مدد سے 4301 رنز بنا چکے ہیں۔
