نیلم منیر نے ایک روز قبل کراچی کے سیاحتی مقامات پر مایوں کے فوٹوشوٹ کی تصاویر اور ویڈیوز شیئر کر کے اپنی شادی کی تقریبات کے آغاز کی تصدیق کی تھی۔ اب انہوں نے نکاح کی تصاویر شیئر کرتے ہوئے مداحوں سے اپنی نئی زندگی کے لیے دعاؤں کی درخواست کی ہے۔ نیلم منیر نے تین جنوری کی شام نکاح کی تصاویر شیئر کیں، تاہم نکاح اور شادی کی دیگر تفصیلات سے متعلق کچھ نہیں بتایا۔
ان تصاویر میں نیلم منیر کو عرب لباس میں ملبوس ایک شخص کے ساتھ رومانوی انداز میں فوٹوشوٹ کراتے ہوئے دیکھا جا سکتا ہے۔ انہیں اپنے شریک حیات کے ہمراہ متحدہ عرب امارات (یو اے ای) کے مختلف مقامات پر تصاویر کھچواتے ہوئے دکھایا گیا ہے۔ اداکارہ نے یہ تصاویر شیئر کرتے ہوئے تصدیق کی کہ انہوں نے نئی زندگی کا آغاز کر دیا ہے اور مداحوں سے دعاؤں کی درخواست بھی کی۔
عرب لباس میں شریک حیات کے ہمراہ تصاویر شیئر کرنے کے بعد، نیلم منیر کے مداحوں میں کچھ تشویش پائی گئی اور انہوں نے کمنٹس میں اداکارہ سے شریک حیات کے بارے میں سوالات کیے۔ تاہم، نیلم منیر نے اپنی شادی اور شریک حیات سے متعلق کوئی معلومات نہیں دیں۔ نکاح کی تصاویر دبئی سے شیئر کی گئیں، اور پہلے ہی قیاس آرائیاں کی جا رہی تھیں کہ نیلم منیر نے دبئی میں شادی کی ہے، لیکن ان کے شریک حیات کے بارے میں تاحال کوئی تفصیل سامنے نہیں آئی۔
