ملک بھر میں پچھلے دو ہفتوں کے دوران برائلر مرغی اور اس کے گوشت کی قیمتوں میں نمایاں اضافہ دیکھنے میں آیا ہے۔ راولپنڈی میں زندہ برائلر مرغی کی قیمت 285 روپے سے بڑھ کر 530 روپے فی کلو تک پہنچ گئی ہے، جبکہ گوشت کی قیمت 900 روپے فی کلو سے تجاوز کر گئی ہے۔ برائلر گوشت کی قیمت میں مجموعی طور پر 450 روپے فی کلو اضافہ ہوا ہے۔
پشاور میں بھی صورتحال مختلف نہیں، جہاں زندہ برائلر مرغی کی قیمت 510 روپے فی کلو تک پہنچ چکی ہے۔ چند روز قبل یہ قیمت 300 سے 320 روپے کے درمیان تھی، لیکن ایک ہفتے میں 210 روپے کا اضافہ دیکھنے میں آیا۔ کراچی میں بھی مرغی کے نرخوں میں زبردست اضافہ ہوا ہے، جہاں گوشت 680 سے 700 روپے فی کلو میں فروخت ہو رہا ہے۔ کمشنر کراچی کی جاری کردہ ریٹ لسٹ میں گوشت کی قیمت 635 روپے فی کلو مقرر ہے، مگر مارکیٹ میں قیمتیں اس سے زیادہ ہیں۔ اس کے علاوہ، فارمی انڈے 330 سے 340 روپے فی درجن میں دستیاب ہیں۔
لاہور میں بھی مرغی کے گوشت کی قیمتوں میں تیزی سے اضافہ ہوا ہے۔ چند روز قبل قیمت 595 روپے فی کلو تھی، جو اب 700 روپے فی کلو تک پہنچ گئی ہے۔ ٹولنٹن مارکیٹ کی ریٹ لسٹ کے مطابق، گوشت کی نئی قیمت 693 روپے مقرر کی گئی ہے۔ میرپورخاص میں برائلر مرغی کی قیمت 700 روپے فی کلو جبکہ بون لیس گوشت کی قیمت 1000 روپے سے بھی تجاوز کر چکی ہے۔ پچھلے پندرہ دنوں کے دوران گوشت کی قیمت میں 290 روپے تک اضافہ ہوا ہے، اور زندہ مرغی کی قیمت 460 سے بڑھ کر 750 روپے فی کلو ہو گئی ہے۔
قیمتوں میں اس اچانک اضافے سے عوام شدید پریشان ہیں اور شہریوں نے خود ساختہ قیمتوں پر گوشت فروخت کرنے والوں کے خلاف کارروائی کا مطالبہ کیا ہے۔
