کراچی کرنسی مارکیٹ کی ہفتہ وار رپورٹ کے مطابق، بیرونی قرضوں کی ادائیگی کے باعث روپے پر دباؤ برقرار رہا اور امریکی ڈالر کی قدر میں اضافہ ریکارڈ کیا گیا، جبکہ یورو اور برطانوی پاؤنڈ میں نمایاں کمی دیکھی گئی۔
رپورٹ کے مطابق، ایک ہفتے میں انٹربینک میں ڈالر کی قیمت 9 پیسے بڑھ کر 279.56 روپے ہوگئی، جبکہ اوپن مارکیٹ میں ڈالر 35 پیسے مہنگا ہو کر 279.85 روپے پر پہنچ گیا۔
یورو کی قیمت میں 2 روپے 93 پیسے کی کمی ہوئی اور یہ 288.30 روپے پر بند ہوا، جبکہ برطانوی پاؤنڈ 3 روپے 33 پیسے سستا ہو کر 348.26 روپے کا ہو گیا۔ یو اے ای درہم کی قیمت 10 پیسے بڑھ کر 76.15 روپے اور سعودی ریال 10 پیسے اضافے کے بعد 74.45 روپے پر پہنچ گیا۔
اسٹیٹ بینک کے مطابق، ایک ہفتے کے دوران بیرونی قرض کی مد میں 14 کروڑ 30 لاکھ ڈالر کی ادائیگی کی گئی، جس کے بعد اسٹیٹ بینک کے ذخائر 11.85 ارب ڈالر سے کم ہو کر 11.71 ارب ڈالر پر آ گئے۔
کمرشل بینکوں کے ذخائر میں 18 کروڑ ڈالر کا اضافہ ریکارڈ کیا گیا، جس کے بعد یہ 4.70 ارب ڈالر تک پہنچ گئے۔ مجموعی ملکی ذخائر میں 3.70 کروڑ ڈالر کا اضافہ ہوا، اور یہ 16.40 ارب ڈالر کی سطح پر آ گئے۔
